Кәсіби бағдар беру қызметі
Қазіргі таңда қоғамның барлық саласында қарқынды өзгерістер орын алуда. Технологиялардың дамуы, жаңа мамандықтардың пайда болуы және еңбек нарығы талаптарының үнемі жаңарып отыруы – оқушылардың болашақ мамандығын саналы түрде таңдауын қажет етеді. Осыған байланысты мектепте кәсіби бағдар беру жұмыстары жүйелі түрде ұйымдастырылып келеді. Кәсіби бағдарлау – бұл тек мамандық таңдау емес, сонымен қатар оқушының өз қабілетін, қызығушылығын және мүмкіндіктерін жан-жақты танып, дұрыс бағыт алуына көмектесетін маңызды үдеріс.
№16 Төлеубай Аманов атындағы жалпы орта білім беретін мектебінде кәсіби бағдар беру қызметі оқушылардың жеке ерекшеліктерін ескере отырып жүзеге асырылады. Мектепте түрлі кәсіби бағыттағы ақпараттар, мамандықтар әлемі туралы мәліметтер, кәсіби тесттер мен өзін-өзі тануға арналған әдістер ұсынылады. Бұл жұмыстар оқушылардың болашаққа деген көзқарасын қалыптастырып, саналы таңдау жасауына мүмкіндік береді.
Кәсіби бағдар беру жұмысы оқушылардың өзін-өзі анықтауына, қабілеттерін дұрыс бағалауына және болашақ кәсіби даму жолын жоспарлауына бағытталған. Сонымен қатар, бұл бағыттағы жұмыстар оқушылардың еңбек нарығында сұранысқа ие, бәсекеге қабілетті маман болып қалыптасуына негіз қалайды.
Мектеп ұжымы оқушылардың болашағына бейжай қарамай, кәсіби таңдауда сенімді бағыт беретін қолдаушы орта қалыптастыруды басты мақсат етеді. Осы бағытта ата-аналармен тығыз байланыс орнатылып, бірлескен жұмыстар жүргізілуде.
Кәсіптік бағдар берудің мақсаты:
• Әрбір оқушының жеке қызығушылығы, қабілеті, оқу жетістіктері мен өмірлік жоспарларын ескере отырып, саналы кәсіби таңдау жасауына жағдай жасау;
• Оқушылар мен олардың ата-аналарының мамандық таңдауға психологиялық дайындығын қалыптастыру.
Кәсіптік бағдар берудің міндеттері:
• Оқушылардың кәсіби бейімділігін анықтау мақсатында диагностикалық жұмыстар жүргізу;
• Кәсіби өзін-өзі анықтау және болашақ мансапты жоспарлау туралы түсінік беру;
• Әр оқушыға жеке бағыт-бағдар беріп, оның мүмкіндіктерін мамандық талаптарымен сәйкестендіруге көмектесу.