"Ерлігі ұрпаққа үлгі" тақырыбында танымдық кездесу

Ұлы Отан соғысының 80 жылдығына орай, Семей қаласының орталықтандырылған кітапхана жүйесі Әлия Молдағұлованың 100 жылдығына арналған "Ерлігі ұрпаққа үлгі" тақырыбында танымдық кездесу өткізді. Іс-шараға қатысушыларға батыр қыздың өмірі мен ерлігі туралы мағлұмат берілді. Кітапхана жүйесі арнайы көрме ұйымдастырып, келушілерге Әлия туралы деректерді ұсынды. Сонымен қатар, батырдың ерлігі жайлы деректі фильмнен үзінді көрсетілді. 7 "В" сыныбындағы "Жас сарбаз" әскери тобы жүрекжарды жырларын оқып, патриоттық рух сыйлады. АӘД пәнінің мұғалімі Екпін Мұратұлы домбырамен жүрек тебірентерлік ән орындап, ұлттық өнерді насихаттады. Кездесудің мақсаты – жастарға батырлықты, отансүйгіштікті және ел қорғау рухын дәріптеу болды. Іс-шараға қатысушылар Әлия Молдағұлованың ерлігіне тәнті болып, тарихтың маңызды кезеңін еске алды. Осындай танымдық шаралардың қалалық мекемелермен бірлесе отырып ұйымдастырылуы көңіл қуантады. Ұлы Отан соғысының 80 жылдығын атап өту – тарихи жадымызды сақтаудың және келер ұрпаққа батырлықты үлгі етудің бірден-бір жолы.